Yandex.Taxi Հայաստան-ը կոչ է արել վերանայել օրինագիծը

Yandex.Taxi Հայաստանն այսօր հանդես է եկել հայտարարությամբ՝ տաքսիների շուկան կարգավորող օրենսդրական փոփոխությունների վերաբերյալ:

Ներկայացնում ենք ստորեւ.

«Վերջերս ՀՀ տարածքային կառավարման եւ ենթակառուցվածքների նախարարությունը ներկայացրեց ուղեւորափոխադրումների ոլորտը կարգավորող օրենքի նոր նախագիծ, որը, ընդունվելու պարագայում, լրջագույն սոցիալական ազդեցություն կունենա տասնյակ հազարավոր անձանց վրա, ովքեր ուղեւորափոխադրման ծառայություն են իրականացնում աշխատելով օնլայն հարթակների հետ։

Մենք բազմակողմանիորեն քննարկել եւ այս հարցազրույցում առանձնացրել ենք մեր հիմնական մտահոգությունները։

Մենք հասկանում ենք նախարարության նպատակները, այն է՝ շուկան դարձնել «սպիտակ», թափանցիկ, որակյալ ու կառավարելի, ինչը միանգամայն գովելի է։ Բայց այն տարբերակով, որ ներկայացվում է օրենքի նախագիծը, հնարավոր չէ իրագործել դրանք. փոխարենը՝ այն «կճնշի» օրենքի տառը պահպանող վարորդներին, իսկ վարորդների մյուս կեսին կմղի դեպի «սեւ շուկա»։ Մենք այս կանխատեսումն անում ենք՝ հիմք ընդունելով այլ երկրներում մեր ահռելի փորձը։

Մենք համոզված ենք, որ նույն նպատակներին հնարավոր է հասնել առավել պարզ եղանակներով, ինչը հավելյալ բեռ չի առաջացնի վարորդների համար եւ թույլ կտա նրանց շարունակել աշխատանքը․ լինելով Եվրոպայի ամենամեծ ՏՏ ընկերություններից մեկը՝ մենք ունենք բոլոր թվային մեխանիզմներն ու հմտությունները՝ այդ արդյունքին հասնելու համար։

Այսօր մենք նախարարություն ենք ուղարկել նախագծի առնչությամբ մեր դիտարկումներն ու առաջարկները։ Մենք նրանց հետ կապի մեջ ենք եւ պատրաստ ենք համատեղել բոլոր հնարավոր ջանքերը՝ օրենսդրությունն արդիականացնելու, արդյունավետ եւ երկարաժամկետ կտրվածքով հաջողակ դարձնելու նպատակով։

Մենք հավատում ենք եւ լիահույս ենք, որ նախագիծը եւս մեկ անգամ վերանայելով՝ նախարարությունը եւ Ազգային ժողովը կկարողանան ստեղծել այնպիսի օրենսդրություն, որը կնպաստի ուղեւորափոխադրման շուկայի թե՛ թափանցիկությանը եւ թե՛ արդիականացմանը՝ շահեկան դիրք ապահովելով նաեւ Հայաստանի բոլոր անհատ տաքսիստների համար։

Մենք բաց ենք եւ ողջունում ենք ցանկացած համագործակցություն այս ոլորտում ու պատրաստ ենք մեր մասնակցությունը բերել արդարամիտ օրենսդրության ստեղծմանը»։